مدد

حسبنا ربي
حسبنا نعم الوكيل
حسبنا و كلمة الم
من جوا قلبي بتعصره
حسبنا و حروف ندم
ع الأحبه إللي دماهم
من طهاته المسك واقف مستحي
حسبنا ربي
حسبنا ربي علي إللي غطرسته ما ليها حد
علي إللي واقف كل يوم يقتل شهيد
و بألف حد
علي إللي ما بيرحم صغير أو كبير
ع إللي أتعمى و كفره عماه
ع إللي يقتل طفل زي محمد الدره في طفولته
ع إللي يقتل شيخ مسن
أو عجوز قاعد على كرسي الشلل
من يوم ما شفته
هم دول أولاد أفاعي
هم دول سبب البلاوي
بص يا يعقوب عيالك
شايف الخلفه إللي تفرح
هم فاكرين لما يستشهد ياسين
يبقوا فازوا بالقضيه
هم مش عارفين
بأن الموت لوحده يحبل النسوان
و إللي تحبل
طلقها بيجيب ياسين
هو أحمد لما مات خفنا و جرينا؟
و لا في بيوتنا أدرينا
قوله يا رنتيسي لما تروح له
أوعى يزعل مننا
أوعى يحسب إننا بعنا القضيه
قوله دمه و دم كل الأبرياء
دول دين علينا
قوله ثاره بكره نأخده
و برضه بأدينا القويه
قوله يارنتيسي لما تشوفه
أوعى يشتكي حلنا لربه
قوله مش معنى أن فيه بنا جبان
أننا بعناه بدمه
قوله مش معنى أن فيه حكام بتسكت
أو ملوك قاعده بتحمي الكرسي
يبقى إحنا أتخرسنا
قوله جيش المهدي بيلملم جراحه
و إللي راحوا
حلفين لناخد من دماهم كل قطره
حلفين لنصنع منها كام مليون مناضل
حلفين لنصنع من كراسي المشلولين
شظي و قنابل
قوله إن صلاح الدين لازم حيرجع
قوله إن مسجدنا إللي مخنوق بالنجاسه
حلفين في يوم حنطهره
و معلش يا ثالث حرم
معلش لو كانت دموعنا لوحدها بتنزل عليهم
أصلهم غالين علينا
و إللي حيصبر قلوبنا
إننا عارفين مكانهم
دول زمانهم
هم إللي باكين علينا
ما أحنا حالنا يستحق أن يكون لينا
حيطه و مبكى
شوف شعوبنا من المحيط
و لبعد مكه
كلهم بيمصمصوا
بس الشفايف
و إللي حاكمينهم بياكلوا ويشربوا
في طبق الخيانه
و دي الجنايه
و أسمعوا يلي ودانكم من عجين
أسمعوا و أشهد ياربي
زي ما شهد الزمان
حأقف و أقولها
بعلو صوتي
أنه خاين
إللي فاتح داره يستقبل عدوه
يبقى خاين
و إللي بيساعد على ضرب العراق
ما هو برضه خاين
و إللي شايل جوا أرضه
سلاح عدانا
يبقى خاين
وإللي بيزوره في داره
برضه خاين
و إللي بيساعد على فلسطيني واحد
يبقى خاين
دي المراره
من الخيانه أمر من الحنضل في زورنا
و مش شارون وحده إللي مسئول
عن هد دورنا
و لا هو إللي بيقَّتل بس
أطفالنا وشيوخنا
دا أحنا بنا زيه فيه كام ميت جبان
لازم نحدد مين عدانا
ولازم نوحد صفنا
لازم نخلي الزاد إيماننا
ولازم نوحد ربنا
لازم نصحي الغلبانين
و نقول لهم
آن الآوان
و نقول لموسى
و عيسى
ومحمد
مدد

مشكور كتير أخي على موضوعك الجميل و القيم
أجمل و أرق التحيات الك
أخوك/ أحمد